Dmir il-Kummissjoni għas-Sigurtà fl-Ikel

Id-dmir tal-Kummissjoni għas- Sigurta’ fl-Ikel huwa li timmonitorja, tikkordina u tirrevedi il-prattiċi, l-oprazzjonijiet u l-attivitajiet kollha li għandhom x’jaqsmu ma’ l-ikel u għal dan il-għan għandha:

(a) tapplika b’mod effettiv il-prinċipju ta’ prekawzjoni meta jiġi identifikat jew raġjonevolment suspettat li jkun hemm riskju għall-konsumatur;

(b) timmonitorja l-infurzar ta’ kull leġislazzjoni, standards jew prattiċi rilevanti rigward negozji tal-ikel, postijiet tal-ikel u persuni li joperaw fin-negozju tal-ikel;

(ċ) tamministra sistema effiċjenti u effettiv għal għassa rapida, ġbir lura ta’ prodott u tneħħija ta’ prodott biex tipproteġi l-konsumatur minn kull riskju li jkun ġie identifikat jew suspettat fi prodotti li jkunu diġà disponibbli għall-konsumatur;

(d) tagħmel dawk l-affarijiet kollha li jkunu neċessarji biex tiżgura li l-obbligi internazzjonali li jidħol għalihom il-Gvern, li għandhomx’jaqsmu ma’ l-ikel, jiġu mħarsa;

(e) tifformula u timplimenta politiki u strateġiji li jkollhom għanijiet li jaħsbu għal pjanijiet immedjati u pjanijiet futuri, rigward l-affarijiet kollha li għandhom x’jaqsmu ma’ l-ikel, ikluż l-isviluppar ta’ pjan Nazzjonali ta’ sorveljanza u nfurzar dwar is-Sigurtà fl-Ikel u biex tiżgura l-implimentazzjoni effettiva, trasparenti u komprensiva ta’ dak il-pjan;

(f) tagħti parir lill-Ministru dwar kull ħaġa li għandha x’taqsam mas-Sigurtà fl-Ikel jew fuq talba tal-Ministru jew, jekk jidhrilha li jkun xieraq, mingħajr talba bħal din;

(g) tagħmel dawk l-istudji, riċerka jew investigazzjonijiet dwar kull ħaġa li għandha x’taqsam ma’ l-ikel, u għal dan il-għan għandha titlob is-sottomissjoni ta’ kull informazzjoni u tanalizza u tinterpreta kull data jew informazzjoni sottomessa lilha;

(h) tiżgura li jinżammu records u reġistri xierqa biex jiġiżgurat li l-persuni responsabbli għal kull prodott tal-ikel jistgħu jiġu identifikati;

(i) toħroġ dawk il-linji ta’ gwida li jistgħu jkunu meħtieġa rigward is-sigurtà fl-ikel;

(j) tikkonsidra u tirrevedi l-effiċjenza ta’ prattiċi ta’ Sigurtà fl-Ikel li jkunu adottati minn żmien għal żmien, u tagħmel rapport dwarhom lill-Ministru għall-anqas darba fis-sena;

(k) teżerċita dawk il-funzjonijiet l-oħra li l-Ministru jista’jippreskrivi b’regolamenti; u

(l) taqdi dawk id-dmirijiet l-oħra li jistgħu jwasslu għall-aħjar twettieq tal-funzjonijiet tagħha taħt dan l-Att.